Færslur: 2009 Janúar
30.01.2009 21:44
Var betra veður á Hólum en í Hnappadalnum???
Mummi setti inn nýtt albúm þar eru nokkrar myndir frá Hólum.
Þessi mynd sýnir veðurblíðuna sem var á Hólum í dag þarna eru Vinningur, Þríhella og Dregill að trimma rekstrarhringinn. Mummi og gollinn á eftir. Hvernig er það fara þeir ekkert á bak á Hólum?
Veðrið var líka frábært í Hlíðinni í dag og færið hreinn unaður. Eina vandamálið svolítið kaldar tær.
Hrossin kunnu vel að meta þetta eins og við voru kát, léttstíg og ekki laust við að það væri leikur í þeim sumum. Útigangurinn naut sín líka vel í dag rölti um og lék sér jafnvel gömlu höfðingjarnir voru að tuskast við tryppin á milli þess sem þeir fengu sér blund í heyinu.
Skuggsýn Stælsdóttir var fyrirmyndarhestur dagsins kunni vel að meta flott færi ís og snjó.
Litlu hvuttarnir stækka og stækka. Ófeigur orðinn 830 gr og bróðir hans 780 gr. Deila leyfði sér þann munað að fara uppí fjárhús í kvöld og skilja hvuttana sofandi eftir heima. Þeir urðu ekki sérlega kátir þegar þeir vöknuðu og mjólkurbúið var ekki á staðnum og létu óánægju sína í ljós með miklum hljóðum. Salómon sannfærðist enn betur um að þeir séu ekki bara ljótir heldur líka leiðinlegir að hans mati. En samt verður hann alltaf að skoða þá reglulega.
Í gær fórum við í heimsókn í Skáney vorum að heilsa uppá Randi áður en hún fer út til Noregs og Finnlands að kenna og sjá hvernig hún hefði það eftir afmælið. Hún og Skúli urðu jú áttræð um daginn.
Frábært hvað hún er orðinn vinsæll reiðkennari þarna út, enda ekki við öðru að búast. Stendur sig alltaf með prýði stelpan.Skrifað af Sigrún Ólafsdóttir
28.01.2009 21:00
Góður dagur.
Þetta er Snotra Kubbsdóttir upplýsingafulltrúi Deilu þarna er hún að ritskoða fréttirnar og passa að Októvía leki ekki mikilvægum upplýsingu.
Annars er allt gott að frétta af Deilu og litlu hvuttunum í dag,ég held að þeir hafi stækkað um helming síðan á sunnudaginn. Enda er dagsverk þeirra að sofa og drekka.
Ég var eins og alvöru ljósa og vigtaði hvuttana. Ófeigur var 710 gr en hin töffarinn 600 gr.
Dagurinn í dag var góður gott veður og frábært reiðfæri, enn bætist við í hesthúsið nú kom myndarleg Kjarnadóttir í tamningu. Spennandi að sjá hvernig hún verður.
Annars var allt hreyft í hesthúsinu nema draumaprinsinn Sparisjóður sem er aðallega að einbeita sér að því að verða eldri og komast á tamninga aldur.
Fyrirmyndarhestur dagsins er Gosi Hlynsson, hann og Skúli komu skælbrosandi úr síðasta reiðtúr dagsins.
Veður og færi eins og var í dag mætti nú alveg vera í nokkra daga jafnvel vikur, það mundi kæta bæði okkur og útiganginn.
Fékk skýrslu frá Mumma í dag varðandi hestana okkar sem hann er með í þjálfun á Hólum.
Gengur bara nokkuð vel þó eru þau afar mismunandi verkefni, en allavega bað hann mig ekki að sækja neitt.
Mummi stendur í ströngu í kvöld því hann er að dæma úrtökuna fyrir KS deildina á Sauðarkróki. Vonandi stendur hann sig strákurinn.
Þarf við tækifæri að segja ykkur hvernig staðan er á fylfullum hryssum hjá okkur, við hvað hestum þær eru fylfullar og o.s.f.v
Skrifað af Sigrún Ólafsdóttir
27.01.2009 21:07
Sorg og gleði í hundaræktinni.
Það er búið að vera nóg um að vera undanfarna daga í Hlíðinni, sumt skemmtilegt annað leiðinlegt.
Litlu hvuttarnir hennar Deilu voru svolítið bráðlátir að komast í heiminn, en þeir áttu eins og áður sagði að fæðast í kringum 3 febrúar. Á sunnudagsmorguninn ákvað Deila að vera heima þegar við fórum í hesthúsið. Það er mjög óvenjulegt en þar sem hún var orðin mjög þung á sér höfðum við ekki áhyggjur af henni töldum bara að hún vildi hafa það náðugt. Þegar við komum heim í hádegismat þá var fæddur einn hvolpur síðan hafa fæðst fjórir. En því miður lifa bara tveir af þeim, skýringin sennilega sú að hvolparnir hafa fæðst hálfum mánuði fyrir tímann.
En nóg um það þessu verður ekki breytt.
Í þvottahúsinu eru núna tveir sprækir og fínir upprennandi smalar sem dafna vel þrátt fyrir bráðlætið að komast í heiminn. Annar heitir Ófeigur en hin hefur ekki enn fengið nafn.
Við vonum að þeir séu komnir úr hættu og hafi bara það markmið í lífinu að verða ofursmalar.
Snotra er mjög upptekin af þessum nýju gripum og með sérstöku leyfi Deilu fær hún að þefa og þvo sé til mikillar ánægju. Sjarminn fer sennilega af þessu þegar hvuttarnir fara að hanga í skottinu hennar og heimta endalausan leik.
Síðustu dagar hafa boðið uppá blíðu og frábært reiðfæri hér í Hlíðinni það hefur verið notað óspart og því ekki gefist tími til ritsmíða. Mummi kom heim um helgina og var liðtækur í hesthúsinu eins og venjulega. Sýndi okkur smá sýnishorn af því sem hann er að læra núna á Hólum. Vá væri ekki frábært að vera ungur (yngri) og vera á Hólum?
Fyrirmyndarhestur dagsins var Erla Piltsdóttir alltaf að verða betri og betri.
Skrifað af Sigrún Ólafsdóttir
25.01.2009 00:22
Ísland í dag og tíkurnar....
Salómon fyrirsæta.
Það er búið að vera vor í dag hiti og rigning, hálka og drulla er það ekki venjulegt vertarvor?
Í morgun bauð ég stóðhestunum uppá að vera úti í gerði að gera ,,ekkert sérstakt,, þessu góða boði mínu tóku þeir heldur fálega, ráfuðu um tóku smá hopp og skopp og komu svo heim að dyrum. Þegar ég opnaði dyrnar var beðið með óþreyju eftir því að komast inn úr rigningunni og sem betur fer hafði engum dottið í hug að velta sér. Þeim líkaði sem sagt ekki þetta vetrarvor því venjulega eru þeir ekki tilbúnir að fara inn þegar kallið kemur.
Þó nokkur endurnýjun var í hesthúsinu í dag, Dugur vinur minn Dynsson setti undir sig betri fótinn og tók sér far í höfuðborgina þar sem hann ætlar að vera fyrirmyndarhestur.
Í hans pláss kom svo ung hryssa sem er að byrja sitt nám í reiðhestafræðum, einnig kom í hesthúsið garpur sem hefur beðið á ,,hliðarlínunni,, um nokkurt skeið.
Í dag fengum við skemmtilegt bréf frá vinkonu okkar í Svíþjóð sem á tvo hesta frá okkur.
Hún er að spá í að heimsækja okkur í sumar og finna sér nýja arftaka þeirra hesta sem hafa verið hennar reiðhestar síðustu ár. Annars var aðal efni bréfsins spurningar um ástandið á Íslandi. Fréttirnar sem hún hafði úr fjölmiðlum úti voru hreint ekki glæsilegar, kreppa, borgarstyrjöld og endalaus mótmæli. En þetta er kjarkkona og ætlar samt að koma.
Hef verið afar hugsandi varðandi þennan pólitíska glundroða sem tryllir allt samfélagið þessa dagana. Veikindi leiðtoga beggja stjórnarflokka eru sorgleg og vonandi ná þau fullri heilsu sem fyrst. En langt gengur fólk til að halda völdum, getur verið að völdin séu heilsunnar virði? Ég held ekki, en ég bý líka í fjöllunum. Annars er það ljóst að það er bráð óhollt að vera ráðherra í fljótu bragði man ég eftir fjórum nú á síðustu árum sem veikst hafa meðan þeir gengdu embætti. Skrítin tilviljun eða kannske ekki tilviljun? Það gífurlega álag sem fylgir svona embættum rífur greinilega í og potar í veika punkta.
Pólitíkin er skrítin tík og nær hjá mér að fylgjast með okkar tík sem heldur áfram að blása út.
Skrifað af Sigrún Ólafsdóttir
22.01.2009 21:56
Fimmtudagur 22 janúar.
Ég þakka fyrir allar góðu kveðjurnar og símtölin í gær, gott að eiga stuðning þegar aldurinn færist yfir.
Kveðja SkúliAnnars var hundleiðinlegt rok hér í Hlíðinni í dag og eins gott að hafa inni aðstöðu til að geta farið á bak með góðu móti. Hefðum sennilega fokið af baki ef við hefðum farið út.
Veðurhljóðin glumdu svo á hlöðunni að sumum hrossunum var ekki vel við og voru mjög kvik og stressuð. En allt gekk vel og fyrirmyndarhestur dagsins er Urð Oríonsdóttir.
Vonum að eitthvað betra veður verði í boði um helgina.
Skrifað af Sigrún Ólafsdóttir
20.01.2009 22:42
Mótmæli og brotthvarf
Í dag var dagur mótmæla fólk safnaðist saman niður í miðbæ Reykjavíkur og mótmælti af líf og sál. Ég skil vel að fólk sé búið að missa þolinmæðina, ég hefði örugglega farið niður í bæ ef að ég hefði verið í Reykjavík. En mótmæli eru vandmeðfarin eins og velgengni auðvelt að fara úr leið og lenda í vandræðum. Vonandi ganga mótmælin vel og bera árangur án þess að allt fari úr böndunum.
Ég held að krummarnir hérna í Hlíðinni hafi líka verið að mótmæla í dag. Þeir sátu uppá staur og krunkuðu með miklum látum Snotru til mikils ama. Öðru hverju tóku þeir stutt útsýnisflug svona 50 metra í einu allavega passaði uppá meter að þegar Snotra var að ná þeim flugu þeir upp.
Spurning hvort að hún ætti að fá liðstyrk frá Badda frænda í Garðabænum til að stöðva þessa krummamótmælendur?Deila blæs út og fer hægar yfir með hverjum deginum er orðin sannkölluð Bumbulína.
Hvað haldið þið að þeir verði nú margir hvuttarnir ????? Bíðum spennt.
Allt gekk sinn vana gang í hesthúsinu riðið út, járnað og snyrt.
Fyrirmyndarhestur dagsins var Skjöldur Huginsson jákvæður og námfús foli.
Á morgun verðum við gamla settið sennilega týnd þannig ef að þið sjáið okkur þá eru það ofsjónir.
Skúli hefur samt ekki týnst síðustu hálfa öld
Skrifað af Sigrún Ólafsdóttir
19.01.2009 22:23
Við Perla og ,,snjóflóðið,,
Það var frábært veður í Hlíðinni í dag bara nokkuð hlýtt hægviðri og snjór. Sem sagt frábært útreiðaveður og skemmtilegt færi með snjó og ís á veginum.
Við Perla vinkona mín vorum einmitt að hugsa um hvað allt væri hreint og fallegt þegar við fórum framhjá hesthúsinu í dag. Vorum bara á rólegu feti og löngum taumi þegar við allt í einu heyrðum mikinn skruðning og læti. Perla ákvað að þarna væri á ferðinni ógurlegt snjóflóð sem best væri að forða (allavega) sér undan og líka knapanum ef að hann næði að fylgja með. Ósjálfráð viðbrögð og heppni gerðu það að verkum að þetta varð bara fín æfing af einhverskonar fljúgandi starti, þar sem hestur og knapi urðu samferða áfram. Ég veit samt ekki alveg hvernig en það er auka atriði þegar allt endar vel.
En snjóflóðið ógurlega var snjórinn sem sest hafði á þakið í nótt og var svo að bráðna í blíðunni í dag. Perla vildi bara vera viss.
Núna er hann Bassi okkar kominn í skóla. Jón Ben fékk hann lánaðan og er nú með hann í knapamerkjanámi á Hvanneyri. Þeir tóku smá æfingu hér heima áður en þeir fóru svona til að vera vissir um að þeir ættu samleið og stefndu að sama marki. Það er að verða ,,bestir,,
æfingin gekk vel og nú vinna þeir bara saman að markmiðinu sínu.Eins og þið vissuð þá var ég í Reykjavíkinni um helgina að reyna að finna góðan flokksformann. Það gekk nú aldeilis vel og nú eigum við í flokknum flottan formann já og flokksstjórn. Ungur og ferskur hópur sem hefur alla burði til að ná árangri. Leiðtogar annara flokka hafa pirrað sig í allan dag í fjölmiðlum og gert sitt besta til að finna eitthvað formanninum og flokknum til foráttu. Ég held að það fari svolítið í taugarnar á þeim hversu vel þetta flokksþing gekk. Þeim langar nú sumum að endurnýja hjá sér.
Og ef þeir bara vissu hvað úrvalið var gott.
Skrifað af Sigrún Ólafsdóttir
16.01.2009 23:41
Sólarpönnukökur og staðan í dag.
Bara svo allt sé á hreinu þá hefði ég átt að blogg 14 janúar (ef það hefði verið samband) um sólarpönnukökusiðinn okkar í Hlíðinni. Þann dag sést sólin aftur hjá okkur eftir jólafríið sitt sem er frá því 30 nóvember. Þá eru alltaf bakaðar pönnukökur og haldið uppá þetta í Hlíðinni. Amma mín hún Hrafnhildur hélt mikið uppá þennan sið og fylgdist grant með því hvort sólin næði að senda smá geisla niður á bæjarhólinn þennan dag.
Núna er ég stödd í höfuðborginni og er bara í ljómandi netsambandi
Ég brá mér í bæinn m a til að kanna hvort ég fengi ekki nýjan flokksformann sem ég yrði ánægð með. Það er svona eins og að skoða hest hann þarf að vera hæfileikaríkur, heiðarlegur,viljugur og að auki hafa forustuhæfileika á við úrvals forustusauð.
Allt kemur þetta í ljós á sunnudaginn.
Undanfarnir dagar hafa verið fínir þokkalegt veður og gengið vel að ríða út. Nemendurnir að ,,vestan,, eru í góðum gír og lofa góðu. Reyndar eins og margir aðrir í hesthúsinu en þar sem ég veit að orðalagið komst til skila um daginn þá læt ég þetta fylgja.
Eina dagstund tókum við svo í að lesa númerin af kindunum sem nú hafa verið með hrúta sér til skemmtunnar frá því 19 desember. Mest mæddi þetta á honum Helga því hann hefur góða sjón og þar af leiðandi miklu fljótari að lesa númerin heldur en gamla settið með ,,Tigergleraugun,.
Allt gekk þetta vel og nú eru allir lambsfeðurnir komnir á blað hjá viðkomandi kind.
Næsta vers í kindastússi er svo þegar ,,sónarvinur,, okkar frá Noregi kemur og segir okkur hvað mörg lömb eru í hverri kind.
Skrifað af Sigrún Ólafsdóttir
15.01.2009 23:35
Vonlaust netsamband.
Sæl verið þið.
Smá skilaboð til ykkar, síðan á sunnudag hefur netsambandið í Hlíðinni verið ónýtt.
Er núna stödd á öðrum bæ til að kíkja á póstinn minn.
Vonandi stendur þetta til bóta.
Kem inn sem fyrst með fullt af ferskum fréttum af mönnum og dýrum.
Kveðja Sigrún
Skrifað af Sigrún Ólafsdóttir
10.01.2009 22:41
Leyndarmál og önnur mál.
Við Deila höfum alveg gleymt að segja ykkur leyndarmál sem nú er að verða opinbert leyndarmál.
Þá verður það frétt
Deila skrapp í heimsókn til hennar Önnu Dóru á Bergi og hitti þar þennan fína hund.
Árangur þeirrar heimsóknar er að koma fram og nú er Deila ekki langt á undan okkur uppí hús og nennir ekki að fylgja okkur í alla reiðtúra út afleggjara. Enda kemur í ljós þegar við skoðum dagatalið að það styttist í hvolpadaginn mikla hér í Hlíðinni. Afmælisdagurinn hennar Lóu frænku minnar kemur vel til greina það er 3 febrúar.
Bíðum spennt því við verðum að fara að koma okkur upp fleiri fjárhundum.
Var að setja inn nýtt albúm sem heitir hundar.
Í gær bættist við í hesthúsið þá komu tveir félagar að vestan, annan höfum við fengið áður til okkar en hin er að hefja sitt nám. Álitlegir hestar og verður spennandi að vinna í þeim.
Það var mikið riðið út og járnað einnig skoðuðum við nokkur trippi sem við erum að byrja að temja. Það er svo spennandi að skoða þau og sjá þeirra fyrstu spor og hreyfingar á nýjum skeifum. Og enn einu sinni var kvöldmaturinn snæddur á ókristilegum tíma.
Það var leiðinlegt veður í dag og þá þakkar maður fyrir að hafa smá inniaðstöðu til að vinna með hrossin. Snyrtum líka veturgömlu tryppin og settum þau á dekurstaðinn sinn.
Mummi fór um fjárhúsin og hesthúsið vopnaður myndavél í dag vonast til að geta sýnt ykkur afraksturinn fljótt.
Skrifað af Sigrún Ólafsdóttir
09.01.2009 23:27
Keyrum heim að Hólum......
Í gær fóru nokkrir vinir okkar úr hesthúsinu í langt ferðalag, ferðinni var heitið alla leið að Hólum. Þetta voru frá vinstri á myndinni Þríhella, Vinningur, Fannar og Dregill.
Þar sem að veðurspáin var heldur leiðinleg fyrir helgina þá var ákveðið að drífa þau bara norður á meðan engin hálka væri og gott veður. Mummi smellti þeim á kerruna og lagði af stað fyrir hádegi, var svo kominn aftur til baka um kvöldið. Hann hafði með sér fína selskapsdömu hana Snotru mína. Hún ferðast venjulega ekki mikið nema á sínum fjórum fótum um heimalandið svo þetta var heljar bíltúr hjá henni, fékk meira að segja pylsu á Blönduósi.
Fannari er ætlað viðamesta hlutverkið af hópnum sem sagt að vera nemendahestur hjá Mumma. Í því felst að þeir fari saman í gegnum súrt og sætt í náminu í vetur.
Hin hrossin þrjú eru á mismunandi stigum í tamningu og þjálfun, ætlumst við gamla settið til þess að þau hafi gagn af og hann gaman af samstarfinu.
Til gamans má geta þess að hestarnir þrír Fannar, Vinningur og Dregill eru bræður. En svolítið ,,snúnir,, bræður þ.e.a.s Fannar og Dregill eru báðir undan Gusti frá Hóli en Fannar og Vinningur eru báðir undan Tign frá Meðalfelli. Sem sagt Fannar er aðal bróðirinn.
Svo er það hún Þríhella hún er Hlynsdóttir frá Lambastöðum. Það er alltaf gaman þegar fólk heyrir nafnið hennar í fyrsta sinn, flestir segja ,,ha,, hinir horfa skilnings litlir á mann og hugsa mikið er hún óskýrmælt.
En Þríhella fékk nafnið sitt innan við klukkustundar gömul. Hún er fædd ,,útá hlíð,, sem við köllum þar undir berggangi sem heita Þríhellur. Set inn mynd við tækifæri þar sem þið getið séð Þríhellurnar.
Læt fylgja með hvers vegna Fannar og Vinningur heita sínum nöfnum. Þegar Fannar fæddist 28 maí var alhvít jörð því ekki um annað að ræða. Vinningsnafnið er þannig til komið að ég fór eitt sinn á reiðhallarsýningu í Víðidalinn og vann folatoll undir Gauta frá Reykjavík. Um sumarið fór ég svo með Tignina mína undir hann og þá varð hann Vinningur til.
Hér fyrir neðan er svo Fannar kominn í fínu svítuna sína á Hólum.
Vonandi ekki með heimþrá.
Skrifað af Sigrún Ólafsdóttir
07.01.2009 22:41
Eftirlit og ormalyfsgjöf
Í gær var nóg um að vera eins og stundum áður hér í Hlíðinni.
Vaskir sveinar sem undanfarna daga hafa verið að moka skít úr tryppastíunum kláruðu það með glæsibrag um miðjan dag í gær. Að því loknu rákum við inn allt stóðið settum ormalyf í allan hópinn og skoðuðum ástand hvers og eins. Það gerum við þannig að eftir að við höfum rekið allan hópinn inní gerði þá rekum við fimm í einu inná gang í hesthúsinu. Þá er ormalyfinu smellt í þau og um leið metið holdafar og kannað hvort nokkur sé með hnjúska. Allt var í stakasta lagi og útlitið bara mjög gott. Við tókum inn nokkur hross og við það fylltist hesthúsið. Á morgun er svo stefnan tekin á Hóla með hestana sem Mummi ætlar að vera með þar. Þá kemur pláss sem sennilega fyllist aftur á föstudaginn.
Það var rok og dálítil rigning í dag nokkrir hestar voru járnaðir aðrir fengu trimm.
Svo kom hún Gróa okkar í heimsókn alltaf gaman að rifja upp skemmtilega tíma, tíma þegar að hún var heimalingur hjá okkur eins og hún segir sjálf.
Drengirnir voru greinilega ekki búnir að fá nóg eftir járningar dagsins og smelltu sér í körfubolta. Spurning um að láta þá járna aðeins meira á morgun svo að orkan fari ekki í eitthvað vafasamt sprikl.
Skrifað af Sigrún Ólafsdóttir
05.01.2009 23:11
Sitt lítið af hverju
Það var vor í lofti í dag súld, þoka, dumbungur, logn já og ýmislegt fleira sem gæti alveg verið vor.
Þó ekki, of mikill snjór í fjöllunum, jólaskraut, myrkur og jólaboð í gær. Nei það er ekki vor.
Jólaboðið var frekar fámennt á okkar mælikvarða, en góðmennt engu að síður. Þar mættu frændur, frænkur, vinir og velunnarar. Við erum svo nísk á dagsbirtuna á þessum tíma að boðið byrjaði klukkan fjögur, þá var búið að taka nokkra spretti, járna og ýmislegt fleira.
Við gamla settið erum mjög upptekin þessa dagana að kynna okkur námsefni 1 árs nema hrossaræktar og reiðmennskubrautar Háskólans á Hólum. Hæg heimatökin eins og sagt er. Skoða bækur, blöð og verkefni sem Mummi er með. Síðan þegar kemur í hesthúsið verðum við að fá að sjá og prófa, spá og spekulegra.
Teljum Mumma bara trú um að þetta sé góð upprifjun fyrir hann í jólafríinu. Við höfum verið svo heppin að fá að fylgjast með ,,krökkunum okkar,, sem hafa verið á Hólum og þannig haft tök á að fá smá smjörþef af því sem þar fer fram. Meira um það seinna.
Skrifað af Sigrún Ólafsdóttir
03.01.2009 22:58
Það er margt skrítið......
Salómon svarti ,,draumaprins,,
Það er margt skrítið og skemmtilegt bara ef að maður fer að veita því eftirtekt.
Ég var að hugsa um það í dag hvernig minningar af ýmsum toga verða til. Til dæmis af hverju man maður sumt miklu betur en annað? Jafnvel ,,ómerkilegustu ,, hlutir verða eftirminnilegir vegna þess að það var eitthvað sérstakt sem maður tengir við það.
Þegar að ég rifja upp mínar fyrstu minningar varðandi hesta þá koma uppí hugann nokkurs konar ,,klippt,, myndskeið. Það er að segja ég man einhver atvik vel og sé þau fyrir mér en annað er óljóst og hefur ekki geymst eins vel í minningunni.
Smá sýnishorn.
Ég er berbakt á henni Fjöður gömlu, leirljósblesóttri hryssu sem frænka mín átti. Ég er varla meira en 4 ára við erum að koma niður Kúabollana það er teymt undir mér, mamma og móðursystir mín labba sitthvoru megin við Fjöður og allt er í róleg heitum. En skyndilega tekur Fjöður smá hopp yfir þurran lækjarfarveg. Hoppið var hvorki hátt eða harkalegt en þó nóg til að litli knapinn rúllaði aftur af og lenti milli þúfna. Lendingin var mjúk og hafði ekki í för með sér nein líkamleg meiðsli en eitthvað hefur stoltið hruflast því lengi á eftir var mér meinilla við frásagnir af þessu. Þetta var sem sagt ,,þegar Sigrún datt í fyrsta sinna af baki,,
Annað...
Þegar ég var lítil þá hafði ég svæsið ofnæmi fyrir nýfæddum folöldum. Þetta lýsti sér þannig að ef að ég snerti folöld sem voru ný köstuð og ekki orðin þurr þá steyptist ég út í roða og kláðabólum á höndum og í andliti. Þessu fylgdu svo mikil óþægindi að ég lét mig hafa það að rjúka EKKI út í girðingu um leið og það fæddist folald. Loks kom þó að því að ég gat ekki annað en rokið til og heilsað uppá nýfætt upprennandi eftirlæti. Í kjölfarið breyttist ég í einhverja veru sem líktist helst krakkaormi með jarðaberjaáferð á höndum og andliti. Kláðinn og óþægindin voru nær óbærileg í nokkra klukkutíma, en eins og alltaf lagaðist það aftur.
Um haustið fór ég í skólann sennilega í 8 ára bekk, þegar kom að skólaskoðun var okkur sagt að ef að eitthvað væri að hjá okkur ættum við endilega að ræða það við hjúkkuna hún gæti leyst úr öllum helstu krankleikum. Það var því með mikilli eftirvæntingu sem ég bað hjúkkuna um sprautu við nýfæddum folöldum.
Enga fékk ég sprautuna og ekki man ég hvað hún sagði en eitt er víst svipnum á henni gleymi ég aldrei.
En að öðru við í Hlíðinni eigum litla vinkonu í Garðabænum hún á afmæli svo að ég tileinka henni myndina sem fylgir blogginu mínu í kvöld. Innilegar hamingju óskir til þín frá okkur í sveitinni.
Skrifað af Sigrún Ólafsdóttir
02.01.2009 22:22
Janúar er fínn
Sæl verið þið !
Þá er kominn janúar skemmtilegur mánuður með dögum sem alltaf verða lengri og lengri þegar á mánuðinn líður. Þó svo að jólin og allt sem þeim tilheyrir sé gott og skemmtilegt þá er alltaf ljúft þegar lífið fer aftur í sinn vana gang. Hjá okkur í sveitinni eru svo sem flestir dagar nokkuð svipaðir á meðan allar skeppnur eru á gjöf, en þó meiri róleg heit um hátíðirnar. Þegar ég kom út í morgun var veðráttan og hitastigið þannig að ég hefði orðið nokkuð ánægð hvort heldur í apríl eða maí. Nei annars það var full dimmt fyrir vorið. Janúar er bara fínn.
Úr hesthúsinu er bara allt gott að frétta, reyndar flest hrossin að byrja sína dagskrá en þó eru nokkur sem eru bara að komast í skemmtilegt form. Stóðhestarnir fengu mikinn tíma í dag trimmuðu, viðruðu sig og að lokum var farið í alsherjar þrif og hárgreiðslu.
Er byrjuð að vinna svolítið í honum Glundroða mínum Frægssyni, sennilega hefur hann verið taminn í fyrra lífi. Allavega er hann enn sem komið er fyrirmyndar nemandi.
Folöldin eru mjög ánægð með nýju klippinguna og gaman að sjá hvað allt verður þurrt og snyrtilegt í stíunum hjá þeim þegar þau hafa verið rökuð. Fengu steinefnablöndu útá heyið í fyrsta sinn í morgun, voru alveg viss um að þetta væri eitthvað stórhættulegt og henntust út og suður áður en þau þorðu að smakka.
Smelli inn einni vormynd hérna með, það er svo gott að sjá vorið í janúar.
Skrifað af Sigrún Ólafsdóttir
- 1