03.12.2011 23:04

Dregill er uppáhalds



Höfðinginn Dregill frá Magnússkógum og Mummi árið 2011.

Myndina tók gæðaljósmyndarinn Björn A Einarsson í Búðardal.

Dregill er sonur Gusts frá Hóli og Kolskarar frá Magnússkógum og einn af okkar uppáhalds hestum útaf honum Gusti frá Hóli.

Það var frábært vetrarveður í dag og gott reiðfæri á þjöppuðum snjó hér í Hlíðinni.
Gaman hefði nú verið að smella af nokkrum myndum en tíminn var notaður í annað og birtutíminn naumt skammtaður þessa dagana. Já tíminn hann er dýrmætur og alveg ótrúlegt hvað auðvelt er að eyða honum í eitthvað skemmtilegt. Ég hef oft hugsað um það á svona dögum hvað það er dásamlegt að vera að stússa í því sem manni er boðið uppá í sveitinni eða í fjöllunum eins og hér í Hlíðinni. Endalaus verkefni og það sem meira er áhugaverð verkefni og nóg af þeim. Lindex og Rolex verða bara hjómið eitt þegar fjallakyrðin, hestar og kindur eru annarsvegar. Já þetta er ekkert röfl, þetta eru staðreyndir kæru lesendur og þetta vita þeir sem reynt hafa trúið mér.

Mikið af trippum eru að stíga sín fyrstu spor undir manni þessa dagana og gaman að sjá hvernig gengur. Aðdáun mín á Gusti frá Hóli hefur ekki dvínað, ég hef ákveðið að halda undir Blæ frá Torfunesi og Hrimur frá Hofi stendur fyrir sínu.
Er þetta ekki góð setning svona undir rós?
Já bara gaman í hesthúsinu þessa daganana svo sem eins og venjulega.

Næsta föstudag er svo aðalfundur FT og er allt á fullu í undirbúningi fyrir hann.
vo eru jólin þarna einhversstaðar og rétt að fara að huga að þeim þegar tími gefst til allavega að hlusta á jólalögin.


01.12.2011 21:43

Frost á fróni



Þessi mynd heitir ,, að kasta toppi,,  kannske þekkir einhver toppinn fína ?

Það er vetur í Hlíðinni þessa dagana þó nokkur snjór en frostið ekki eins mikið og spáð var.
Ljómandi gott reiðfæri og mun bjartara en á meðan vorveðrið var um daginn, já alltaf getur maður fundið eitthvað jákvætt við þetta allt saman.
Fyrir stuttu síðan byrjuðum við að gefa útigangshrossunum sem að tóku því fagnandi. Folaldshryssurnar eru sér og fá fyrirmyndarmeðferð og þjónustu eins og vera ber.
Þessa dagana hafa nokkur tryppi frá okkur verið járnuð í fyrsta sinn og eru að byrja að spreyta sig í skóla lífsins. Þetta eru m.a Snekkja dóttir Glotta frá Sveinatungu og Skútu hans Mumma en Snekkja sigraði folaldasýningu í Söðulsholti og var valin folald sýningar á sínum tíma. Blástur undan Kolskör minni og Gusti frá Hóli, Léttlindur sem er undan Létt og Hróðri frá Refsstöðum, svo að eitthvað sé talið. Nú er bara að sjá hvernig gengur á næstunni.

Nú er ég alveg hætt að þora að segja ykkur frekari hrútaheimtusögur en verð þó að læða þeim upplýsingum að ykkur að ef að þið finnið mig ekki seinni hluta vetrar þá verð ég sennilega farin í sauðburð í Dalina.
Verður maður ekki að reyna að klóra uppí meðlögin hjá þessum víðförlu flökkuhrútum ?

Í kvöld var svo tekin smá húsmóður snúningur og bakaðar tvær smákökutegundir.
Ég var reyndar búin að gera eina góða uppskrift en það er líka búið að borða kökurnar svo að ekki verða þær notaðar á jólunum. Það voru góðu kornflekskökurnar sem að ég fékk uppskrift af hjá henni Ástu á Heggsstöðum á sínum tíma. Æðislegar kökur og ekki skemmir fyrir hvað góðar minningar rifjast alltaf upp þegar ég geri þær og hugsa til Ástu.



27.11.2011 22:30

Haustfundur Hrossvest.



Haustfundur Hrossvest var haldinn í Borgarnesi sunnudaginn 27 nóvember.
Á fundinum voru nokkrir félagsmenn heiðraðir fyrir störf sín í þágu sambandsins til margra ára.
Á myndinni hér fyrir ofan eru átta af þeim níu félagsmönnum sem hlutu gullmerki og viðurkenningu sambandsins. Aftari röð f.v Leifur Kr. Jóhannesson, Haukur Sveinbjörnsson, Árni Guðmundsson, Einar E. Gíslason, fremri röð f.v Gísli Höskuldsson, Sigurborg Jónsdóttir, Ólöf Guðbrandsdóttir og Ragnar Hallsson. Högni Bæringsson gat því miður ekki mætt.



Þarna eru svo þeir sem að hlutu verðlaun fyrir kynbótahross sem efst stóðu í hverjum flokki.
Hrossaræktarbúið Berg var valið hrossaræktarbú ársins hjá Hrossvest árið 2011.



Fundurinn var nokkuð vel sóttur en auk verðlaunaafhendinga voru tvö erindi á dagskrá.
Guðlaugur Antonsson fór yfir sýningaárið 2011 og Guðmar í Sandhólaferju flutti erindi um fóstuvísafluttninga og sæðingar.



Það voru ekki allir háir í loftinu sem voru á fundinum, hér er lítil vinkona mín og ,,ömmustelpa,, mætt á fundinn með alvöru ömmu sinni. Flottar skvísurnar.

Ég set svo inn fleiri myndir frá fundinum á næstunni.

25.11.2011 22:40

Jólasnjórinn...........



Alhvít jörð í Hlíðinni og ágætis útreiðafæri þó svo að kuldaboli biti smá í andlitið.

Ég greip myndavélina og smellti af nokkrum myndum í dag af því tilefni að hún Lisette var að fara heim til Svíþjóðar. Hún hefur verið hér hjá okkur í nokkrar vikur að kynna sér frumtamningar. Það er gaman að fá svona áhugasamt fólk sem til er í að breyta um lífsstíl og fara úr stjórnunnarstöðu í stóru fyrirtæki til Íslands að vinna við hesta í nokkrar vikur.
Myndin hér fyrir ofan er tekin í dag af Mumma og Lis en fljótt á litið er eins og þetta sé ein manneskja og hestur með margar lappir.
Ég er samt að ergja mig á línunni sem að kemur inná myndirnar en þetta er rekstrarspottinn okkar og því þarfa þing.



Síðasti reiðtúrinn á Íslandi í bili en svo kemur Lis aftur í sumar og fer m.a í hestaferðir.
Takk fyrir samveruna Lis og alla hjálpina, við munum sakna þín og örugglega Salómon líka.

Aftekningar ganga nokkuð vel og eru rúmlega hálfnaðar. Kindurnar sem að ekki er búið að taka af fara ennþá út á daginn en í dag fannst þeim að útivist þessa árs væri örugglega á enda.
Þær stóðu hundfúlar heim í rétt fram að hádegi en fóru svo á beit og hafa örugglega hugsað okkur þegjandi þörfina.
Hrúturinn Rótækur Raftsson heimtist svo í Dölunum í gær en þar kom hann fram í fylgd nokkurra kinda. Sá tími er nú kominn að líklegt má teljast að hann hafi náð að auka kyn sitt og því viðbúið að afkvæmin fæðist bæði í Hörðudalnum og Hraunhreppnum. Nú er bara spurningin hvort að einhverjir seðlar fari af stað bænda á milli ? Hvort það verða seðlar með hrútatollum eða seðlar með meðlagsgreiðslum kemur í ljós á næstunni. Annars eru seðlar af flestum tegundum að verða sjalséðir svo að sennilega verða þetta bara pappírslaus viðskipti.

Við síðustu stóðtalningu kom í ljós að tvö trippi hafa sennilega farið á flakk og væri gott ef að þið hefðuð það í huga. Annað er rauð hryssa tveggja vetra og hitt er jarpur hestur vetur gamall. Endilega látið mig vita ef að þið fréttið eitthvað hér í kring.


22.11.2011 22:44

Ýmislegt skal ég segja ykkur

Í dag var fyrsti í aftekningu þegar tekin var smá skorpa eftir reiðtúr um fjallið, tamningar og gestamóttökur. Það er sálfræðilega gott að verð byrjuð í þessu ati og hugsa um að ekki sé allt eftir, hálfnað verk þá hafið er. Rúmlega 90 stykki komnar með jólaklippinguna.

Þrumur og eldingar rufu fjallaþögnina í nótt með þeim afleiðingum að hross úr annari sveit tóku sprettinn og komu heim að túngirðingu.
Greyin hafa sennilega ímyndað sér að nú væri gamlárskvöld og mannfólkið að trillast í flugeldabrjálæði einu sinni enn.
Það var ekki nóg með að það væri ljósagangur heldur var ísing yfir öllu í morgun og hreinlega heppni að takast að standa á löppunum.
Já það er sennilega veturinn sem er að heilsa uppá okkur þessa dagana.

Mér var litið á almanakið í dag og sá að óðum styttist í jólin, til að það mundi ekki valda mér hugarangri (sko húsfreyjuhlutanum af mér) þá settist ég niður og las aðeins meira í nýju góðu Hrossaræktinni. Og viti menn þessar hugsanir liðu hjá og ég fór í staðinn að hugleiða hvaða stóðhesta væri gáfulegt að nota næsta vor.
Nú ef að ég fer líka að stressast yfir skipulagi og hrútavali fyrir fengitímann þá er ekkert annað í stöðunni en að setjast niður og lesa hrútaskránna.
Það hressir, bætir og kætir rétt eins og Ópalið þannig að lífið verður leikur einn...........eða þannig.

21.11.2011 21:38

Tíminn æðir áfram



Bráðlát og Svartasunna vorið 2008.

Það er líf og fjör að vanda hér í Hlíðinni og ekkert lát á skemmtilegum verkefnum.
Það var algjörlega orðið tímabært að skoða stóðið og taka stöðuna á því, það var sem sagt aðal verkefni dagsins. Ormalyf var gefið á línuna, holdafar og útlit metið með ,,stóru,, gleraugunum já og bara tekið svona alsherjar skoðun.
Margir voru um þau tvö pláss sem að laus voru í hesthúsinu en að lokum voru það tvær draumadrottningar sem að fengu að koma inn.
Það er eiginlega tvennt sem að mig vanhagar um í augnablikinu stærra hesthús og fleiri klukkustundir í sólarhringinn.
Æi maður má nú stundum láta sig dreyma, jafnvel vitleysu ef að maður hefur ekki hátt um það.

Félagarnir Blástur, Léttlindur og Kátur komu heim úr Lundareykjadalnum á föstudaginn.
Nú er bara að skoða hvernig kapparnir koma til þegar farið verður að líta á þá.

Það er margt um að vera í heimi hestamennskunnar um þessar mundir, aðalfundur Félags hrossabænda og Hrossaræktarráðstefnan voru um helgina.
Báðir þessir viðburðir heppnuðust með ágætum og alltaf jafn gaman að hitta hestamenn vítt og breytt af landinu.

Á laugardaginn var svo glæsileg og skemmtileg afmælisveisla hjá fimmtugri stelpu á Kaldárbakka. Takk fyrir ánægjulegt kvöld Hulda.




15.11.2011 21:44

Góður dagur



Það er lúinn bloggari sem skrifar þennan texta eftir góðan en langan dag í hesthúsinu.
Góða veðrið lék við okkur í dag og var mörgum sinnum betra en júní veðrið í vor.
Rúmlega þrjátíu hross voru hreyfð og sum þeirra buðu uppá frábærar samverustundir.
Til gamans þá ætla ég að nefna nokkra feður tryppanna.......... svona eins og tryppin eigi engar mæður. Gustur frá Hóli, Hrymur frá Hofi, Faxi frá Hóli, Baugur frá Víðinesi, Guðfinnur frá Skeljabrekku, Markús frá Langholtsparti, Blær frá Torfunesi, Arður frá Brautarholti, Sólon frá Skáney og svo fleiri og fleiri sem ég tel upp síðar.


Á næstunni þurfum við að sækja kappana sem að við eigum hjá honum Tomma á Kistufelli.
Spennandi hvernig þeir líta út eftir sumardvölina.


Nú er endanleg mynd að verða komin á rollubókina þ.e.a.s hún er að verða marktæk við afstemmingu á því hversu margt fé vantar enn af fjalli. Tölurnar er ekki orðnar ásættanlegar frekar en síðustu árinn þó stefnir í að heldur færra vanti af fjalli en í fyrra..
Svo eru nokkrar eftirleitir á döfinni og vonandi skila þær einhverju.




13.11.2011 22:40

Haustró í Kindalandi



Haustró í Kindalandi.........................

Þær kunnu aldeilis að meta útivistina í dag þessar þegar ég smellti af þeim mynd og grasið það er gott þó aðeins sé það farið að fölna.

Veðrið í dag var Guðdómlegt og þegar það er þannig þá langar mig að gera allt.......
En þar sem að tíminn hefur algjörlega breytt um hraða frá fyrri árum er ekki mjög skynsamlegt að fá nýjar hugmyndir um verkefni sem að eru jafnvel hvorki gáfuleg eða arðvænleg. Svo að ég dróg bara andann djúpt og reyndi að gera bara skynsamlega hluti í blíðunni.
Ég ætla ekki að rekja nákvæmlega það sem ég afrekaði í dag því að eflaust er það misjafnt  hvað ykkur finnst um mikilvægið á verkefnum dagsins.

Morgungjafir, kjötsúpugerð og veitingafluttningar í aðra sveit, eftirleitir (með misjöfnum árangri) skítmokstur, gjafir og hestastúss.
Úpps og einn dagurinn í víðbót bara liðinn eins og ekkert sé og það á algjörlega ólöglegum hraða.

Nú er lokið tveggja helga frumtamninganámskeiðinu sem að Mummi var með í Söðulsholti.
Ég gjóaði með öðru auganu á hópinn þegar ég kom með súpuna til þeirra í dag og sá bara snotur tryppi með flotta knapa.
Góður hópur sem að stefnir á að hittast aftur á námskeiði eftir áramót.



12.11.2011 22:16

Hestamannafélagið Snæfellingur árshátíð 2011



Sigurvegarar ársins Jón Bjarni og Anna Dóra á Bergi með formanni Snæfellings Gunnari Sturlusyni.

Árshátíð Hestamannafélagsins Snæfellings var haldinn í fjósinu á Kóngsbakka í Helgafellssveit þann 11.11.11. Já fjósinu það er rétt lesið hjá ykkur en fjósið er ekkert venjulegt fjós heldur þessi fíni veitingasalur sem að bændur á Kóngsbakka buðu fram til hátíðarinnar.
Og ekki nóg með það heldur skemmti Kóngsbakkatríóið gestum hátíðarinnar.



Þarna eru þeir Tryggvi og Hrólfur í góðum gír.



Maturinn var hreint frábær þökk sé góðum matreiðslumönnum þeim Sæþóri Þorbergs og Lárusi Ástmari Hannessyni.
Matseðillinn ekki af verri endanum lamb, svín og úrvals meðlæti, desertinn var svo sameiginlegt átak stjórnarinnar.................kaffi og tertur eins og allir gátu í sig látið.



Eins og áður sagði voru þau Bergshjón afar sigursæl á árinu og hlutu fjölda viðurkenninga fyrir ræktun sín. Ein verðlaun sem að Bergsbóndinn hlaut komu honum hinsvegar nokkuð á óvart en það voru verðlaunin fyrir frumlegasta höfuðfatið á hátíðinni.
Þarna er einn af staðarhöldurum Sæmundur sem að var jafnframt húfudómari að veita Jóni Bjarna verðlaunin fyrir höfuðfatið.



Á hátíðinni voru dregnir út vinningar í happdrætti félagsins sem að þessu sinni voru afar veglegir. Folatollar, spænir, reiðver, dekkjaúttektir, gisting, veitingar, reiðtúrar, úttektir í verslunum,unaðsolíur og ýmislegt fleira............................
Ekki slæmt að kaupa fimm miða og vinna á fjóra.......eins og ég gerði.
Formaður Hrossvest Gísli Guðmunds datt í lukkipottinn og vann folatoll, hér á myndinni fyrir ofan er hann brosmildur með gjafabréfið góða.



Þarna er Bjarnarhafnarbóninn einbeittur á svip að mynda spússu sína sem að hlaut vinning í happadrættinu.



Að sjálfsögðu var sungið mikið og þarna er það gert undir styrkri stjórn hetjutenóra félagsins.

Vel heppnuð samkoma sem sannarlega er komin til að vera árlegur viðburður hjá félaginu.
Takk kærlega fyrir........... þið duglega fólk sem að gerðu þessa hátíð svona skemmtilega.
Ég hef sett inn fleiri myndir hér á síðuna undir myndaalbúm.

Í dag var það svo námskeið hjá Mumma í Söðulsholti og mörg skemmtileg verkefni hér heima í blíðunni, nánar um það síðar.



08.11.2011 21:09

Hitt og þetta.

Afköst mín hér á blogginu hafa verið í algjöru lágmarki að undanförnu en það skýrist mest af ofhlöðnum dögum og mis nauðsynlegum þeytingi.

Rokdagar í síðustu viku voru nýttir til að klára allt sláturstúss svo að nú eru allar kistur fullar og næsta mál að njóta.

Fundir tóku líka sinn tíma en á föstudaginn var formannafundur LH haldinn í Reykjavík. Þangað mættum við Landsmótsnefndar fólk,  fylgdumst með og tókum þátt í umræðum um landsmótahald. Alltaf líf og fjör þar sem þau mál ber á góma.
Á föstudaginn kom hún Lis frá Svíþjóð til landsins og urðum við því samferða vestur um kvöldið. Hún ætlar að vera hjá okkur í nokkrar vikur og kynnast öllu atinu við tamningar og þjálfun hrossa. Aldeilis munur að fá áhugasama hestakonu með okkur í frumtamningarnar.

Á laugardagskvöldið var svo tekinn skyndirúnntur á uppskeruhátíð hestamanna, borðað úrvalslamb, spjallað og haft gaman með hestamönnum.
Síðan var brunað vestur eftir smá tjútt og móttaka á nýjum tamningatrippum undirbúin en dágóður hópur bætist við á sunnudaginn.
Já óhætt að segja að mörg spennandi hestefni séu á járnum hjá okkur núna.

Í dag var svo bundinn endir á frjálsar ástir hér á túninu en þá voru hrútarnir teknir inn, já einmitt svona í seinna lagi. En þá er bara að líta á björtu hliðarnar og gleðjast yfir því hvað sauðburðurinn fer snemma af stað og hvað meðalvigtin verður góð á snemmbornu lömbunum................því vorið verður svo gott.

Ég verð nú að tuða smá í lokin og það ekki af ástæðulausu................
Þið sem að hugsið ykkur að keyra upp Hnappadalinn og Heydalinn á næstunni í Guðsbænum búið ykkur eins og þið séuð að taka þátt í torfærukeppni. Vegurinn er ónýtur......
Mér þykir nokkuð vænt um vegagerðina og mína góðu kunningja sem þar starfa en nú er þetta alveg að verða gott.
Ég ætla samt að hlífa ykkur við myndum en þær koma samt innan skamms ef að þetta verður svona mikið lengur. Ég get þá allavega vælt í ykkur.
Mér finnst það samt ekki aðlaðandi að hafa vegaholumyndir á blogginu en nauðsyn getur brotið lög og margt fleira.



02.11.2011 22:07

Alltaf gaman að fá vísur....



Stungið saman nefjum í góða veðrinu........................þegar það var í boði.

Ég var að ..þvælast,, um heimasíðuna í gær og fann blogg frá því í október 2009 þar sem ég er að argast í rjúpnaskyttum og tuða svolítið. Mér fannst upplagt að deila þessum tengli á fésbókarsíðunni minni sem og ég gerði. Og viti menn það varð sko ekki til einskis skal ég segja ykkur því kella græddi þessa fínu vísu.

Einar upp til fjalla
yli húsa fjær
ramba rjúpnaskyttur
reiðist Hlíðarmær.
Karl minn komdu hérna
komdu ég er skass.
Hlaða skaltu hólkinn
og hitta í þeirra rass.

Skáldið góða er Valur Óskarsson.

Takk fyrir sendinguna Valur hvernig gat þér dottið í hug að ég væri skass? Hahahha.........

Nú liggur fyrir viðbragðsáætlun fyrir næstu helgi til að fækka óboðnum rjúpnaskyttum sem að flæddu um alla landaeignina síðustu helgi og trufluðu okkar sérþjálfuðu og sérvöldu elskur.

Spurning hvort að þetta verði örlögin???
http://skessuhorn.is/Default.asp?sid_id=24845&tId=99&Tre_Rod=001|002|&fre_id=121661&meira=1


31.10.2011 22:57

Námskeiðsnjósnir.



Um helgina var Mummi með frumtamninganámskeið í Söðulsholti, þangað mætti góður hópur af áhugsömum hestamönnum. Hver nemandi kom með tvö tryppi með sér til að vinna með á námskeiðinu. Námskeiðið stóð frá kl 9.00 - 18.00 laugardag og sunnudag en síðan koma þau aftur saman eftir tvær vikur og halda áfram með tryppin sín. Þarna er hluti hópsins að skoða hrossin hvert hjá öðru og undirbúa fyrsta tímann.
Ég kom við með smá snarl fyrir hópinn og laumaðist einn hring með myndavélina, vona að ekki verði sett lögbann á mig.



Það var létt yfir mannskapnum eins og sjá má á þessari mynd.



Það var þétt setinn bekkurinn en námskeiðið var þannig upp sett að allir fylgdust með og gátu þannig séð aðferðir með mismunandi hestgerðum.



Laus í hringgerði..................myndgæðin ekki sérstök en samt................



Svo var það snarlið ekki er nú vit að vera að brasa mikið svangur í svona stússi.



Og alveg nauðsynlegt að spjalla svona á milli atriða.



Aðstaðan í Söðulsholti er svo frábær að það er næstum hægt að leggja sig eftir matinn.

Veðrið heldur áfram að vera með leiðindi og í dag var það  rok, slidda og hitastigið heldur lágt sem boðið var uppá. Á svona dögum er bara fínt að sinna bókhaldi og inniverkum.
Engin rólegheit á næstunni en meira um það síðar.................

29.10.2011 21:54

Nú er bræla í Hlíðinni



Það er nú bara þannig tíðarfar núna að manni veitir ekkert af því að rifja upp eitthvað skemmtilegt.  Og þá er bara að skoða svolítið af folaldamyndum frá síðustu árum.
Hér á fyrstu myndinni eru Létt okkar og Léttstígur að stinga saman nefjum, hann er undan Sporði frá Bergi.



Þarna er aftur á móti sjarmatröllið Fleyta sem er dóttir Stíganda frá Stóra-Hofi og Skútu.
Hún er skemmtilegur prakkari sem gaman er að hitta út í haga og sjá hreyfa sig.



Stoltur minn stendur alltaf fyrir sínu og gerir meira að segja húsfreyjuna og ræktandann svolítið stolta stundum. Stoltur er undan Alvari frá Brautarholti og Tign minni.



Þarna er árgerð 2010 Þjóðhátíð litla sem er dóttir Skútu og Glyms frá Skeljabrekku.
Grallari eins og öll afkvæmin hennar Skútu.



Þetta er líka uppáhaldsmynd hjá mér en þarna er Kostur sonur Sparisjóðs og Tignar að hjálpa föður sínum við skyldustörf. Já stundum er vilji allt sem þarf.



Hér er svo Kátur minn að stilla sér upp fyrir myndatöku hann er undan Karúnu og Auði frá Lundum.



Að lokum er svo hér mynd af Auðséð sem er dóttir Karúnar og Sporðs frá Bergi.

Hollt fyrir geðsmunina að skoða myndir af folöldum þegar vindurinn hvín og rigningin streymir niður gluggann.

Annars var þetta fínasti dagur, Mummi var með góðan hóp á frumtamninganámskeiði sem að stendur nú um helgina í Söðulsholti. Ég smellti í súpu og bollur fyrir hópinn og laumaðist svo aðeins með myndavélina inn til þeirra. Spurning að setja inn myndir þegar ég hef fengið birtingarleyfi?

Lífgimbrarnar eru allar komnar inn og Rúnar dýralæknir búin að sprauta þær allar við garnaveiki.
Næst koma svo hrútarnir inn en þeirra ,,útivistarleyfi,, rennur út fljóttlega þetta árið.

27.10.2011 23:35

Skemmtileg mynd.



Þessa skemmtilegu mynd sendi hann Per vinur minn í Danmörku til mín.
Myndin sýnir hluta að kindunum hans en hann ræktar feldfé með afar góðum árangri eins og fjölmörg verðlaun sanna. Við Per kynntumst fyrst þegar að hann hafið eignast hryssu frá okkur og kom til landsins í heimsókn. Síðan þá er mikið vatn runnið til sjávar, hryssuhópurinn hans frá okkur hefur stækkað og afkomendur þeirra komnir vítt og breitt um danaveldi. Per hefur verið afar duglegur að koma í heimsókn til okkar m.a kom hann enn og aftur í réttirnar. Það er gaman að kynnast sauðfjár og hrossabónda í öðru landi.
Takk fyrir komuna Per og nú fer að koma að því að heimsækja þig.....................

Síðasti hópurinn af lömbum fór í slátur í dag og með þeim fóru þær kindur sem að höfðu lokið sínu hlutverki hér á bæ. Það var smalað fram á síðustu stundu og nú er bara að lesa rollubókina með góðu gleraugunum og finna út hvað vantar af fjalli. Ég er samt heldur bjartsýnni á betri tölur þar um heldur en í fyrra en bíðum og sjáum til sennilega verða þær seint taldar góðar þessar lokatölur.

Ég setti inn nokkrar myndir frá folaldasýningunni í Grundarfirði og bæti fleirum við fljóttlega.

23.10.2011 21:06

Þá er veturinn kominn



Haustfagnaður sauðfjárbænda í Dölum fór fram um helgina og að sjálfsögðu drifum við okkur þangað.
Þetta skemmtilega lopapeysumunstur varð á vegi mínum eins og svo ótal mörg önnur sem voru frumleg og falleg. Já það var nokkurskonar lopapeysumót þarna hjá dalamönnum.
Á föstudagskvöldið var 500 manna sviðaveisla haldin á Laugum í Sælingsdal, boðið var uppá ný, reykt og söltuð svið og að auki sviðalappir. Hagyrðingar fóru á kostum undir stjórn Bjarna Harðarsonar fyrrverandi framsóknarmanns. Hvort það var rokan úr framsókn eða eitthvað annað þá fannst mér hann tilþrifalítill og ekki sama fasið á honum og þegar hann var að berjast við Mórakallinn. En það var gaman að þessu og það skiptir mestu.
Það var svo Geirmundur sem að endaði kvöldið með Skagfirskrisveiflu og fjöri fram á nótt.
Ótrúlegt að sjá fólk sem að ekki borðar svið og ekki tilbiður Geirmund mæta með bros á vör til þess eins að skemmta sér með okkur hinum sem borðum og tilbiðjum.
Svona eru sauðfjárbændur skemmtilegir sérstaklega í dölum.

Á laugardaginn var það svo rúningskeppnin góða þar sem að atvinnurúningsmenn og áhugarúningsmenn etja kappi hvern við annan af miklum móð.



Áhorfendur komu víða að og hvöttu sína menn, þarna eru bændur í Bjarnarhöfn og fleiri góðir gestir.

Það var vaskur hópur sem að tók þátt í keppninni og hart barist í báðum umferðum.
En þrátt fyrir að ég væri búin að raða upp í huganum hvernig úrslitin ættu að vera með tilliti til þess að eiga son, fósturtengdason, nágranna og hreppstjóra í hópi keppenda þá bar eldfljótur austlendingur sigur úr bítum. Til hamingju með sigurinn Hafliði bóndi.
Ég held samt áfram að halda með srákunum og hreppstjóranum og efast ekki augnablik um að þeir raði sér í efstu sætin næst.



Keppnin fór fram undir styrkri stjórn Ásmundar Einars Daðasonar, þingmanns sem að sjálfsögðu klæddist sauðfjárhúfu í tilefni dagsins.

Á laugardagskvöldið var svo haldin fjölmenn grillveisla í Dalabúð þar sem að verðlaun fyrir bestu hrútana og ærnar voru afhent. Þar kom líka fram skemmtilegur kór, Drengjakór Hafnarfjarðar en hann er skipaður einum hafnfirðingi, einni konu og stútungsköllum vítt og breytt af landinu.
Allt endaði þetta svo með hörku balli í Dalabúð þar sem að m.a sveitungarnir fjölmenntu í rútu alveg eins og í gamla daga.
Haustfagnaðurinn þetta árið var hreint frábær, takk fyrir það sauðfjárbændur í dölum.

Fleiri myndir koma svo inná síðuna næstu daga þegar að netsambandið leyfir.

Sunnudagurinn var ekki viðburðalaus því þá var haldin folaldasýning í Grundarfirði.
Þangað var brunað en folöldin voru eftir heima, bæði var að mannskapurinn hefur stundað samkvæmislífið af miklum móð og eins stefnum við bara á að koma með þau í Söðulsholt þegar sýningin verður þar seinna í vetur.
Mörg áhugaverð folöld komu fram en myndir og hugleiðingarnar um það allt saman koma við fyrsta tækifæri.

Vel gengur hjá Mumma að bóka á námskeiðið og fer plássum fækkandi (sjá auglýsingu hér fyrir neðan). Um að gera að drífa sig gaman að hittast spá og spekulegra.