27.07.2016 22:55

Sumarsæla í sveitinni.

Við hér í Hlíðinni höfum lang oftast verið ótrúlega heppin með krakkana ,,okkar,,

En í sumar held ég að öll met hafi verið slegin hvað það varðar, þvílíkir snillingar þessar elskur.

Þessi mynd lísir vel stemmingunni sem verið hefur í hópnum, bros og jákvæðni.

Við smelltum þeim í merktar peysur fyrir landsmótið.

Maron og Majbrit komu með okkur þangað en Jacob var bústjóri heima.

Já þegar ég hugsa til þeirra rúmlega 60 sem hafa verið hjá okkur þá get ég ekki gert uppá milli þeirra.

Hvert á sinn hátt hafa verið dásamleg.

 

 

Þarna sýna þau okkur bakhliðina á peysunum með viðeigandi tilþrifum.

 

 

Um tíma bast okkur svo liðsauki en þá kom hún Laura frá Danmörku til okkar.

Hún var einmitt með okkur þegar þessar myndir voru teknar en þá voru við að ganga á Eldborg.

 

 

Það hafði lengi staðið til að fara á Eldborgina og því gott að fá þrýsting frá dönunum okkar að drífa okkur af stað.

Eftir góðan og skemmtilegan laugardag í hestastússi og útreiðum með gestkvæmu ívafi var lagt af stað.

Á leiðinni niður að Eldborg voru ræstir út smalar sem nauðsynlega þurfa að vera í formi þegar haustar.

Ferðin var nokkuð lík svona hrossarekstrarferð, sumir þurftu að hlaupa með.

Dásemdar veður í fallegu umhverfi með skemmtilegu fólki, hvað þarf meira ?

 

 

Eins og sjá má fór tökumaðurinn (konan) ekki alveg fram á brúnina...........

 

 

Jacob var aðeins djarfari..................

 

 

Og þessi hvílir sig á toppnum...............

 
 

 

Þarna eru þær Laura og Majbritt með Tralla og Molla.

 

 

Maron og Gjafar bættust í hópinn.

 

 

Þessi voru voða sæt saman og ánægð með hvort annað.

 

Það hefur verið líflegt hjá okkur undanfarið og nóg að gera á öllum vígstöðum.

Við erum með mjög margt á járnum, bæði tamningahross og ekki síður nokkurn fjölda af söluhrossum.

Það eru hross á mismunandi aldri og tamningastigum. Endilega hafið samband ef að þið eruð í hestaleit.

Einnig hafa komið margir hópar til okkar og umferðin um þær reiðleiðir sem liggja hér um verið mjög mikil.

Til dæmis eru mörg ár síðan svona margir hafa riðið yfir Klifshálinn en það er m.a leiðin frá okkur og yfir í Hítardalinn.

 

 

Nansy vinkona mín frá Ameríku kom um daginn með skemmtilegan hóp með sér.

Hópurinn fór m.a í skoðunarferð uppí fjall og hitti þar stóðið.

Við Proffi minn hittumst og vorum voða kát með hvort annað, vinur okkar frá Ameríku gladdist með okkur.

 

 

Ég hef verið svo heppin að fá að dæma þónokkur hestamannamót í vor og sumar.

Einnig var ég þulur á Íslandsmóti baran og unglinga í Borgarnesi.

Frábært að fá tækifæri til að fylgjast með og sjá flotta hesta og knapa spreyta sig.

 

 

Eftir landsmót var tekin létt málningarsveifla í hesthúsinu.

Menn og hestar eru ánægðir með árangurinn.

Á myndinni er séð fyrir endann á verkinu, þetta gula á gólfinu er ekki málningapensill.

Þetta er hún Snota mín sem hafði sérstakt eftirlit með herlegheitunum.

Ekkert fer framhjá hennar vökulu augum.

 

 

Heyskapurinn hefur gengið nokkuð vel og náðst hafa þurr og góð hey.

Þegar þetta er skrifað er verið að rúlla síðustu stykkjunum af fyrri slætti.

Margir bændur hafa lagt Krabbameinsfélaginu lið með því að kaupa bleikt rúlluplast.

Í mínum huga eru þessar rúllur til heiðurs mömmu minni og öðrum þeim hetjum sem standa í ströngu þessa dagana.

 

 
 
 
 

 

Veiðin hefur verið aldeilis góð í HLíðarvatni þetta sumarið.

Á myndinni er einn afbragðs veiðimaður með aflann sinn.

Myndinni var stoðið af fésbókasíðunni hans vonandi með góðfúslegu leyfi svona eftir á.

 

 

Þessir garpar veiddu líka vel og voru stolltir af því.

Eins og fyrr er þessi mynd illa fengin af fésbókinni þeirra.

 

Nýtingin á tjaldstæðunum hefur líka verið góð þar sem blíðan í sumar hefur verið alveg sérstök.

Núna búum við okkur undir að taka á móti gestum á tjaldstæðið um helgina en þá verður líf og fjör.

Svona til frekari fróðleiks fyrir nýja lesendur þá bjóðum við uppá tjaldstæði, veiðileyfi, reiðkennslu og hestaleigu.

Verið velkomin í Hlíðina.

 
 

 

 
 
 
 
 
 
 

28.06.2016 11:14

Svolítið af tryppunum.

 

Þetta er ónefndur hestur undan Kolskör og Þyti frá Skáney.

 

Aðeins að klóra sér................

 

 

Hann er á leiðinni suður á land með mömmu sinni sem á stefnumót við sjálfan Spuna frá Vesturkoti.

 
 
 

 

Karún mín nýköstuð þann 5 júní s.l ég var svo skjálfhennt þegar ég tók þessa mynd að það er mesta furða hvað hún er lítið hreyfð.

Já blóðþrýstingurinn fór aðeins úr böndunu þetta kvöld enda mikið í húfi. Ég var mætt á staðinn til að fylgjast með gömlu minni kasta og hugðist taka langt og ýtarlegt videó af viðburðinum.  Allt gekk að óskum til að byrja með en svo fór gamanið að kárna. Folaldið var með aðra framlöppina ofan á hausnum og þeir sem hafa lent í því að draga folald frá hryssu vita að það er FAST. Þar sem klukkan var rétt að verða tvö að nóttu og ansi fáliðað heima fyrir voru góð ráð dýr. Eftir mikið fát og misheppnaðar hringingar var ekkert annað í stöðunni en smella sér á jörðina spyrna í bossann á gömlu og taka á af öllum kröftum. Sem betur fer tókst þetta hjá okkur Karúnu og myndar hryssa kom í heiminn.

Ég veit ekki hvor var dasaðri hryssan eða frúin. Folaldið var sprækt, stóð fljótt upp og komst á spena svo að allt leit vel út og ekki sjáanleg nokkur vandræði.

Frúin fór í háttinn alsæl með hvernig til tókst...............hún fær nú helst dramaköst yfir ferfættum sparigripum.

En fjörið var ekki búið.

 

 

Eftir rúmlega sólarhring fárveikstist litla hryssan og var ansi tæpt að það tækist að bjarga henni.

En uppáhalds dýralæknirinn minn hann Hjalti var snöggur að breggðast við þó svo að hann væri í reiðtúr út á Löngufjörum.

Kom og meðhöndlaði folaldið sem hafði veikst svona hastarlega þegar hún kom ekki ,, folaldaskítnum ,, frá sér.

Litlan var svo meðhöndluð í rétt rúma viku, hresstist fjótt og er núna með móðir sinni hjá honum Kafteini Ölnirssyni.

 

 

Já þetta er Kafteinn Ölnirs og Skútuson, fjallmyndarlegur kappi sem mælist 141 cm á herðar einungis 2 vetra gamall.

Hann er í girðingu á Lambastöðum í Laxárdal.

 

Símon sjarmur sem varð 3 vetra nú í vor.

Hann er undan Arion frá Eystra Fróðholti og Karúnu frá Hallkelsstaðahlíð

 

 

Hann hefur aðeins verið að sinna hryssum hér heima í Hlíðinni.

 
 

 

 

Þarna er hún Andvaka sem er undan Ölni frá Akranesi og Karúnu minn.

 

 

Hallkell heitir sá jarpi undan Hersir frá Lambanesi og Kolskör frá Hallkelsstaðahlíð.

Sá skjótti er Lokkur undan Ölni frá Akranesi og Létt frá Hallkelsstaðahlíð.

 

 

Við tökum stundum knús þar sem þessi er upphálds Hagur undan Skýr frá Skálakoti og Kolskör frá Hallkelsstaðahlíð.

Kveikja undan Stimpli frá Vatni og Þríhellu reynir að vera með.

 

 

Brekka litla dóttir Vita frá Kagaðarhóli og Þríhellu frá Hallkelsstaðahlíð og Hjaltalín dóttir Skútu og Álfarins frá Syðri Gegnishólum.

Segja Skúla eitthvað mikilvægt.

 

 

 

 

 
 
 
 
 
 
 

 

 

 

23.06.2016 23:15

Sláttur hafinn hér í Hlíðinni.

Sláttur hófst hér í Hlíðinni þann 22 júní.

Mummi rauk af stað í miklum ham eftir sigur okkar manna á EM í fótbolta.

Hólbrekkan og Hvammurinn urðu fyrir valinu en þessi tún voru alltaf talnin með tiltektinni í kringum gamla bæinn.

Dásamleg er lyktin af ný slegnu grasi og  virkar eins og skotheld staðfesting á því að nú er sumarið komið.

 

Grænt og ilmandi.............við rifjum en sumir snúa eða jafnvel tætla.

 

 

Hér er lagt af stað í fystu rúlluna en ef að allt gengur að óskum verða þær vonandi vel á annað þúsundið.

 

 

Mummi og Jacob að taka hrollinn úr rúlluvélinni og koma öllu á skrið í heyskapnum.

 

 

Og þessi lét ekki sitt eftir liggja því þegar hann hafði rakað í múga var Hólbrekkan rökuð betur.

Já hún Fríða frænka mín í Hafnarfirði hefur oft tekið þessa sveiflu í kringum gamala bæinn.

Hún væri eflaust ánægð með að sjá til stráksa þarna.

 

 

 
 
 
 
 

19.06.2016 22:20

Árleg þjóðhátíðarferð á Löngufjörur.

 

Það er orðinn árviss viðburður að við hér í Hlíðinni smellum okkur á Löngufjörur í kringum 17 júní.

Ferðin verður alltaf lengri og lengri svo það lítur út fyrir að þjóðhátíðardagurinn verði að þjóðhátíðarvikunni áður en langt um líður.

Að þessu sinni var hópurinn stór og afar skemmtilegur.

Hér á eftir kemur smá sýnishorn af því hvað það var gaman hjá okkur.

 

 

Þessar ungu dömur eru frábærlega hestfærar og geta riðið hvert sem er.

 

 

Þarna er hópurinn að leggja af stað eftir höfðinglegar móttökur á Mel.

 

 

Hjónin í Votumýri komu og riðu með okkur.

 

 

Þessi voru hress og kát.

 

 

Já, já og þessar líka.............. enda tilbúnar á hvítu fjörurnar.

 

 

Majbritt og Jakob stóðu sig vel enda harðduglegir danir þar á ferð.

 

 

Í svona ferð verður stundum að raða þétt, verknemarnir tóku því með bros á vör.

 

 

Áfram Danmörk.............þarna eru þau nýbúin að skoða myndarlegt kúabú.

 

 

Þessar fallegu frænkur eru alltaf brosmildar og skemmtilegar.

 

 

Nafna mín er stundum í símanum eins og fleiri Sigrúnar....................

 

 

Þarna erum við Brá flottir ,,íhaldsmenn,, en bara smá stund.

 

 

Maron og Molli áttu góða daga saman.

 

 

Þessi efnilega hestakona er ekkert að væla um aðstoð við til að bera hnakkinn.

 

 

En hann er nú samt næstum eins þungur og hún sjálf.

 

 

Upp fór hann og auðvita er rétt að láta pabbann halda í fyrir sig.

Svona hestakonur verða eitthvað..............

 

 

Þær voru margar efnilegar í þessari ferð, þarna er Þorbjörg að stilla múlinn og þar er gert af nákvæmni.

 

 

Brá og Fannari kemur einstaklega vel saman og brosa hér bæði út að eyrum.

 

 

Baltasar er mikið burstaður enda í smá uppáhaldi.

 

 

Voða sæt saman hann og Majbritt.

 

 

Kjarnakonur Guðný Dís sem verður fulltrúi okkar ferðafélaga á Landsmóti, Elva og Gunna vinkona þeirra.

 

 

Að sjálfsögðu var kvöldvaka og þar fór fram handstöðu keppni.

Skúli og Elva sigruðu enda þræl spræk en ekki alveg jafn gömul...............

 

 

Þarna er sigurvegarinn í flokki húsmæðra.............en þessi getur allt og þetta líka.

 

 

Þessar eru eðal en vita held ég ekkert af því.............. Erla og Auður á góðri stundu.

 

 

Talandi um eðal, Stína og Jonni hress og kát eftir velheppnaðan dag á fjörunum.

 

 

Auðvita er svo sungið eins og vera ber, þarna eru Sigrún og Mummi í léttri sveiflu.

 

Já aldeilis frábær ferð með góðu fólki.

 

 
 
 
 
 
 
 
 
 
 
 
 
 
 
 
 
 
 
 
 
 
 
 
 
 

03.06.2016 07:28

Sólarupprás með honum Sólstafi.

 

Þegar sólin var að brjótast í gegnum morgunþokuna kom þessi litli hestur í heiminn.

Þetta er hann Sólstafur frá Hallkelsstaðahlíð, undan Ási frá Hofsstöðum og Létt frá Hallkelsstaðahlíð.

Þegar húsfreyjan varð eldri á síðasta ári fékk hún eina 5 folatolla í afmælisgjöf, nokkrir af þeim verða folöld í ár.

Já afmælistollarnir mínir breytast nú óðfluga í gæðingsefni.

Get ekki lýst því hvað það er gaman að verða 50+

 

Þar sem að faðirinn er 9,5 töltari varð sá litli að byrja æfingar hið snarasta.

Æfingarnar fóru samt mest fram á brokki...............

 

 

Þernu litla Skýrs lét sér fátt um finnast og var frekar syfjuleg enda ekkert kominn fótaferðatími hvorki fyrir hana eða mig.

 

 

Þessi hryssa sem birtist úr fjallinu í gær var steinsofandi og það var ekki fyrr en ég potaði í hana sem að hún rauk úr draumalandinu.

 

 

Það var svo sem ljótt að trufla þennan væra svefn.

 

 

Þessi hryssa er undan Aljóni frá Nýja Bæ og Rák frá Hallkelsstaðahlíð.

Nú er bara að finna gott nafn á hana sem fyrst.

 

Rák þurfti aðeins að fara úr mynda uppstyllingunni og klóra sér smá.

 

 

Sú litla líka enda er best að gera eins og mamman.

 

 

Og svo Kolskör mín líka..............allir að klóra sér og teyja í morgunsárið.

Kolskör bíður spennt eftir afkvæmi Þyts frá Skáney eins og ég.

 

 

Nú fer heldur betur að færast fjör í leikinn og hryssurnar allar sáttar með að vera komnar í köstunarhólfið sitt.

 

 
 
 
 
 
 
 
 
 
 

31.05.2016 12:13

Já sumarið.

 

Sumarið er tíminn.............

Þessi var alsæl með grænu grösin og hafði sýnilega ekki miklar áhyggjur af snjónum í fjöllunum.

Það höfum við ekki heldur enda er hann nauðsynlegur til að viðhalda góðum skilyrðum bæði í vatnsbúskapnum og gróðurfarinu.

Nú eru bara rétt rúmlega 20 kindur eftir að bera og unnið að því hörðum höndum að marka út og klára sauðburðarstúss.

Það verður kærkomið að kasta kveðju á síðustu kindina um leið og hún fer í gegnum hliði og uppí fjall. Hvenær sem það nú verður.

 

 

Allir voru í sátt og samlyndi að njóta vorsins en Karún mín lætur bíða eftir sér og er ekki ennþá köstuð.

 

 

Litla Snekkjudóttirin sem hefur stillt sér upp í tíma og ótíma var ekki í nokkru stuði til módelstarfa.

Mig grunar að hún vilji ekki myndatökur fyrr en eigandinn hefur fundið á hana gott nafn.

 

 

Sendi mér samt eitt gott blíkk um leið og hún losnaði við mig og myndavélina.

 

 

Við hér í Hlíðinni kunnum alveg að meta blíðuna.

 

 

Svartkolla á draum......................eða kannski drauma.

 

 

.........................um girðingalaust tún.

 

 

Rollan í fjörunni.........................

 

 

Að lokum eru hér myndir sem að ég tók kl 4 í nótt rétt áður en ég fór að sofa.

Þarna er sólin að byrja skína á fjallatoppana hjá nágrönnum okkar í Eyjahreppnum.

 

 

Sólin var líka byrjuð að skína í Hellisdalinn og á Tindadalina.

 

 

Allt var svo kyrrt og hljótt, dásamlegur tími vorið.

Mikið væri gott að þurfa ekkert að sofa á þessum árstíma.

 
 

27.05.2016 13:16

Rigningin maður rigningin.

 

Þó svo að oftast sé nú blíða hér í Hlíðinni eru nú til undantekningar á því.

Það var allavega ekki gott í ,,sjóinn,, þennan morguninn og sennilega hefði sjóveikin tekið öll völd ef lagt hefið verið í ann.

Lambféð stendur í skjóli og freistar þess að bíða af sér veðrið en þegar veðrið hefur staðið í á þriðja sólarhring verður að skjótast á beit.

Bæjarlækurinn er orðinn frekar ljótur og eins gott að engum detti í hug að rjúka yfir hann.

Það jákvæða er að það grænkar og grænkar það er jú draumur bóndans á þessum tíma.

 

 

Það hefur stór hækkað í vatninu síðasta sólarhringinn og hér má sjá mórauðn lit sem gefur til kynna miklar leysingar.

 

 

Öðru hvoru moldskefur vatnið og gusurnar ná langt uppá land.

 

 

Flest er vænt sem vel er grænt...........

Túnin hafa tekið vel við sér og skíturinn sem fór á í apríl er greinilega að vinna heimavinnuna sína.

 

 

Og til að hressa sig aðeins við í rokinu er gott að sjá þessar flottu frænkur sem komu að líta á sauðburðinn.

Moðkarið var staðurinn fyrir fund í bleikudeildinni.

 

 

26.05.2016 12:49

Fyrsta folaldið 2016 hér í Hlíðinni.

 

Aðfaranótt 25 maí þegar bæði var hífandi rok og rigning kom þessi jarpa hryssa í heiminn.

Móðir er Snekkja frá Hallkelsstaðahlíð og faðir Skýr frá Skálakoti.

Ég var nýkomin heim af kvöldvakt og varla vakandi nema á öðru auga þegar mér var litið út og sá að eitthvað hvítt lá fyrir aftan hryssuna.

Þar sem engar líkur voru á ljósu folaldi rauk ég útí bíl og stundaði ofsaakstur út á tún. Sem betur fer stóð hryssan upp í tæka tíð og allt fór vel. Eftir margar stilltar og fallegar vornætur valdi Snekkja þessa skuggalegu nótt.

Eigandinn Mummi hefur ekki enn valið nafn á hryssuna.

 

 

Það er gott að knúsast í vonda veðrinu og fá yl í kroppinn.

Vonandi kemur blíða einn daginn og þá verða teknar betri myndir.

Nú er hún Karún mín næst á köstunarlistanum svo það er eins gott að vera á vaktinni.

22.05.2016 02:08

Vorið.

Mynd Kolbeinn Sverrisson.

Nú fer að síga á seinni hlutann á sauðburðinum hér í Hlíðinni.

En samkvæmt nýjustu tölum eru rétt rúmlega 100 eftir að bera.

Burður hefur gengið nokkuð jafnt og þétt uppá síðkastið eftir líflega byrjun.

 

Mynd Kolbeinn Sverrisson

Eins og sjá má hefur heldur betur fækkað í réttinni en það var biðstofan á fæðingadeildina.

Hjá alvöru listamönnum heita verkin alltaf eitthvað og það á svo sannarlega við þessar fínu myndir frá honum Kolla.

Sú efri heitir Lausafé og sú neðri Fjáraustur.

 

 

Við höfum verið svo lánsöm að fá vaskan hóp af frábæru aðstoðarfólki til að hjálpa okkur í sauðburðinum.

Þarna eru nokkrir kvenskörungar að halda Kolbeini við efnið.

Það hefur verið eins gott að hafa þetta góða aðstoðarfólk bæði í fjárhúsunum og ekki síður heima við til að fóðra liðið.

Mummi flaug í síðustu viku út í danaveldi að kenna en kemur eftir helgina heim.

Takk fyrir alla hjálpina.

 

 

............og þær eru greinilega ánægðar með hvernig til tókst við verkefnið.

Þær eru öflugar þessar kellur, Þóranna, Björg og Brá.

 

 

Majbritt hafði líka góða aðstoð í hesthúsinu þar sem að Halldór og Emilía fylgdu henni eins og skugginn.

Þarna eru þau með Leik Spunason en Fleyta Stígandadóttir fylgjist með að allt fari vel fram.

 

 

Leikur hafði reyndar sérstakt dálæti á Emilíu og vildi helst fara ofaní vasann til að fá sem mesta athygli.

 

 

Majbritt og Baltasar eru sérstakir vinir og brosa alltaf út í eitt þegar þau hittast.

 

 

Sveinbjörn lítur við til að vita hvað er um að vera í hesthúsinu.

Þarna eru hann og Majbritt að taka stöðuna, sá grái lætur sér fátt um finnast.

 

 

Þessar tvær Snekkja og Karún eru komnar í köstunarhólfið báðar fylfullar eftir Skýr frá Skálakoti.

Þær voru afar ánægðar með steinefnastampinn og skiptu honum bróðurlega á milli sín.

Nú er bara að bíða og vona að allt gangi vel þegar þær fara að kasta.

 

 

Síðustu daga hefur þetta verið verkfærasett húsfreyjunnar og verður svo eitthvað áfram.

Númerabókin, vorbókin, penninn, markatöngin og selenpumpan.

Þó svo að við höfum markað mikið út þá er drjúgur hópur eftir sem sér manni alveg fyrir verkefnum.

Góðar stundir.

 

13.05.2016 14:03

Rollurnar rokka.

 

Þessi fallegi dagur.

Sauðburðarljótan vex hraðar en fylgji nokkurs forsetaframbjóðanda svo það var ekki val um sjálfsmynd hér í upphafi frétta.

Sauðburður er kominn á fulla ferð og sennilega um helmingur borinn þegar þetta er skrifað. Ég hafði háleit markmið um að setja hér inn fréttir daglega en tíminn sem vantar í sólarhringinn var ákkúrat sá tími. Við fengum lömb undan öllu þeim hrútum sem að við notuðum í sæðingunum í vetur. Mörg falleg sæðingslömb fæddust þetta árið m.a undan Kornilíusi, Salamon, Roða og fl.

Fyrstu lömbin voru sett út í gær og fullorðnir hrútar standa nú í rúllu og njóta lífsins áhyggjulausir um sauðburð.

Þeir komast sennilega ekki í félag ábyrgra feðra því einhvern veginn finnst mér þeim vera slétt sama um allt nema desemberfjörið.

 

 

Burðurinn hefur gengið vel en alltaf kemur eitthvað upp sem þarfnast natni og samviskusemi til að allt gangi upp.

Þarna eru Maron og Snotra að sinna nýfæddum og nota til þess afmælisgjöfina frá Þóru sem kom að góðum notum.

 

 

Garðarbæjar Golsa og Petrína taka því rólega og bíða eftir því að vinir þeirra úr höfuðborinni mæti á svæðið.

 

 

Þoka gamla er hinsvegar orðin frekar þreytt á biðinni eftir lömbunum þremur og er ekki líkleg til langhlaupa eins og er.

 

 

Rellu Rafts er líka farið að lengja eftir sumri og sól með minkandi bumbu.

 

 

Prinsessa biður fyrir kveðjur í danska herinn þar sem að eigandi hennar bíður eftir fréttum af lömbum.

 

 

Þarna er hún Majbritt með litla mógolsu sem er algjört krútt. Það er búið að vera ansi líflegt í fjárhúsunum og mikið að gera.

Krakkarnir þau Majbritt og Maron hafa staðið sig með mikilli prýði og eru frábærir ,,rollubændur,,

 

 

Geldir gemlingar stunda sjálftöku og viðhafa nokkuð góða ,,borðsiði,, við það.

Húsfreyjan er klár með markatöngina í vasanum og nú verður eitthvað að skoða veðurblíðuna í dag.

Njótið dagsins, ég hef fulla trú á að föstudagurinn 13 sé málið.

 

04.05.2016 22:20

Vorið er komið.

Meðfylgjandi mynd sýnir Mumma og Gangskör í léttri sveiflu með vindinn og kuldann sem ferðafélaga.

 

Jæja það er víst floginn einn mánuður eða svo bloggið orðið heldur betur útundan.

Nú er eins gott að halda því fram að eitthvað gagnlegt og gáfulegt hafi verið afrekað þessar vikur.

Það er allavega þannig stemming núna að ekki hefði veitt af svo sem einum mánuði í viðbót þennan veturinn.

Til að byrja einhversstaðar á fréttunum þá gerðum við góða ferð í Búðardal um daginn.

Ferðin var bæði nýtt til að sýna sig og sjá aðra.

Mummi tók þátt í opnu íþróttamóti Glaðs og nældi sér í gull í töltinu. Húsfreyjan var afar kát með það þar sem að hann var á spari Brúnku minni henni Gangskör.  Hann keppti einnig á Fannari í 5 gangi og varð þar í 3 sæti og hafnað í 2 sæti í skeiðinu.

 

 

Á þessari mynd eru það skeiðkapparnir að taka við verðlaunum.

Fannar er að einbeita sér að sirkusæfingum, ein löpp á lofti og eitt eyra útá hlið. Líkamsræktinn alveg að gera sig.

Þórarinn í Hvítadal stóð í ströngu í kuldanum og veitti verðlaun eins og enginn væri morgundaguinn.

 

 

Það er alltaf gaman að koma í dalina og þá sérstaklega þegar mótin eru haldin.

Þessir voru að handsala eitthvað....................sennilega feit hestakaup................allavega búralegir á svip.

Styrmir Gufudalsbóndi og Mummi.

 

 

Það voru margir góðir dagar í apríl þar sem blíðan var með eindæmum.

Einn svoleiðis dag hitti ég þennan sjarm sem var að viðra sig.

Þessi verður tveggja vetra í vor, faðirinn er Ölnir frá Akranesi og móðir Skúta frá Hallkelsstaðahlíð.

Eitt auga dökkt annað með hring, sjarmur.

 

 

Geirhjúkurinn er ekkert orðinn sumarlegur en sólin gerir sitt besta til að bræða kallinn.

 

 

Nú er vorið alveg að koma enda eins gott þessar frænkur voru farnar að bíða fyrir löngu síðan.

Emilía ,,sauðfjárbóndi,, og Lóa sóla sig á meðan sumarið gerir sig klárt.

Eins og staðan er í dag eru 4 kindur bornar, tvær voru sæddar með Salamon ein sædd með Roða og sú fjórða lifði frjálsum ástum hjá Alberti nágranna okkar.

Niðurstöður..... þrjár hvítar gimbrar, einn hvítur hrútur, tvær svartar gimbrar, ein svartbotnótt og einn svartbotnóttur hrútur.

Fallegustu lömbin ???? Fer eftir smekk en ég er svög fyrir Salamonsafkvæmunum undan þeim Dúnu og Randibotnu Útskriftardóttur.

 

29.03.2016 22:03

Páskastuð

 

Það var fallegur dagur í Hnappadalnum þann 29 mars.

Litirnir sem náttúran bauð uppá voru einstaklega smekklegir.

Já það er hægt að gera margt á svona dögum.

Páskarnir fóru vel með okkur reyndar svo vel að listin á páskaeggjum og mat var orðin frekar lítil á annan dag páska.

Mummi smellti sér til Ameríku og er þar í vellystingum hjá Gosa og fleiri góðum vinum.

Við sem heima vorum nutum góðs af því að góður hluti stór fjölskyldunnar kom saman í ,,því efra,,

 

 

 

Þessar eðaldömur skemmtu okkur eins og venjulega.

 

 

Þær gátu líka hleypt stuði í mannskapinn og voru alveg til í myndatöku með verknemum og aðstoðarfólki.

 

 

Sennilega hafa selskapsdömurnar verið eitthvað þreytandi allavega sofnaði aðal stuðpinninn.

Meira segja í miðri bók...............

 

 

Það fór bara vel um þessar dömur sem spjölluðu og nutu lífsins.

Og hvorug með prjónana það er sjaldséð.

 

 

Þessar komu ekki um páskana en þær komu samt fyrir stuttu síðan fóru á hestbak, heilsuðu uppá kindurnar og ýmislegt fleira.

 

 

Hann Fannar hefur skemmt mörgum í gegnum tíðina og var það engin undantekning þegar dömurnar fengu sér smá reiðtúr.

 

 

Og auðvita var kallinn knúsaður í bak og fyrir eftir reiðtúrinn.

 

 

Sigurður lambhrútur var mjög áhugaverður og grandskoðaður.

 

 

Amman kom líka með og tók út búskapinn á bænum.

Já það getur verið stuð í sveitinni.

 

 

 

 
 

 

 
 
 

24.03.2016 11:18

Velheppnað í villta vestrinu.

Þrjú efstu liðin í Vesturlandsdeildinni í hestaíþróttum árið 2016.

 

1.Snókur/Cintamani – 187 stig

Hanne Smidesang – liðsstjóri, Jakob Svavar Sigurðsson, Leifur Gunnarsson, Benedikt Þór Kristjánsson.

2.Leiknir – 167 stig

Randi Holaker - liðsstjóri, Haukur Bjarnason, Berglind Ragnarsdóttir, Konráð Valur Sveinsson.

3.Eques – 141 stig

Guðmundur M. Skúlason – liðsstjóri, Bjarki Þór Gunnarsson, Guðbjartur Þór Stefánsson, Pernille Lyager Möller.

4.Hjálmhestar – 130 stig

Máni Hilmarsson – liðsstjóri, Þorgeir Ólafsson, Julia Katz, Sigurður Sigurðarson.

5.Trefjar – 117 stig

Gunnar Halldórsson – liðsstjóri, Halldór Sigurkarlsson, Iðunn Silja Svansdóttir, Styrmir Sæmundsson.

6.Berg/Hrísdalur – 115 stig

Anna Dóra Markúsdóttir - liðsstjóri, Jón Bjarni Þorvarðarson, Siguroddur Pétursson, Lárus Ástmar Hannesson.

 

Lið Snóks/Cintamani fagnaði sigri í 4 af 5 greinum deildarinnar og vann nokkuð sannfærandi sigur en 20 stigum munaði á þeim og Liði Leiknis sem endaði í öðru sæti.

Það voru svo lið Trefja og Berg/Hrísdalur sem höfnuðu í tveim neðstu sætunum og missa því sæti sitt í deildinni fyrir næsta ár en gætu þó unnið sæti sitt aftur í gegnum úrtöku.

 

 

Það var keppt í tveimur greinum í gær flugskeiði og gæðingafimi.

Á myndinni eru 5 efstu knapar í skeiðinu.

Niðurstöðurnar voru eftirfarandi:

1.Konráð Valur Sveinsson – Kjarkur frá Árbæjarhjáleigu – Leiknir – 4.99

2.Þorgeir Ólafsson – Ögrunn frá Leirulæk – Hjálmhestar – 5.24

3.Styrmir Sæmundsson – Skjóni frá Stapa – Trefjar – 5.37

4.Jón Bjarni Þorvarðarson – Haki frá Bergi – Berg/Hrísdalur –5.38

5.Guðmundur M. Skúlason – Fannar frá Hallkelsstaðahlíð – Eques – 5.66

6.Benedikt Þór Kristjánsson – Niður frá Miðsitju – Snókur/Cintamani – 5.68

7.Haukur Bjarnason – Þórfinnur frá Skáney – Leiknir – 5.75

8.Máni Hilmarsson – Mjölnir frá Hvammi – Hjálmhestar – 5.75

9.Guðbjartur Þór Stefánsson – Prins frá Skipanesi – Eques – 5.85

10.Halldór Sigurkarlsson – Gná frá Borgarnesi – Trefjar – 6.03

11.Hanne Smidesang – Straumur frá Skrúð – Snókur/Cintamani – 6.06

12.Lárus Ástmar Hannesson – Magni frá Lýsuhóli – Berg/Hrísdalur – 6.18

13.Jakob Svavar Sigurðsson – Ívar frá Steinsholti – Snókur/Cintamani – 6.18

14.Julia Katz – Abraham frá Lundum II – Hjálmhestar – 6.24

15.Berglind Ragnarsdóttir – Nökkvi frá Lækjarbotnum – Leiknir – 6.48

16.Siguroddur Pétursson – Heiða frá Austurkoti -Berg/Hrísdalur – 6.67

17.Gunnar Halldórsson – Nótt frá Kommu – Trefjar – 6.70

18.Bjarki Þór Gunnarsson – Logi frá Syðstu-Fossum – Eques – 0.00

 

Og hér er fjórfætti sigurvegarinn kom með.

 

 

Nokkrir að ,,vestan,, já svo sem allir að vestan enda eðaldrengir allir sem einn.

 

 

Jakob Svavar sigraði gæðingafimina með glæsibrag.

Á myndinni eru 5 efstu í þeirri keppni.

Úrslit

1.Jakob Svavar Sigurðsson – Gloría frá Skúfslæk – Snókur/Cintamani – 7.67

2.Berglind Ragnarsdóttir – Frakkur frá Laugavöllum – Leiknir – 7.00

3.Randi Holaker – Þytur frá Skáney – Leiknir – 6.69

4.Pernille Lyager Möller – Álfsteinn frá Hvollsvelli – Eques - 6.65

5.Hanne Smidesang – Roði frá Syðri-Hofdölum – Snókur/Cintamani – 6.57

 

 

Þessi voru efst í stigakeppninni.

1.Jakob Svavar Sigurðsson – 28.5 stig

2.Berglind Ragnarsdóttir – 22 stig

3.Siguroddur Pétursson – 19 stig

Miklar vangaveltur voru um það í áhorfendastúkunni hvað Jakob hefði fengið í verðlaun frá Húsasmiðjunni.

Getgátur voru allt frá hjartastuðtæki til hrærvélar, engin niðurstaða kom fram sem trúverðug gæti talist.

Þannig að enn ríkir algjör óvissa um það.

 

 

Jakob hlaut einnig farandgrip sem gefin var af Söðulsholti e.h.f.

Verðlaun voru einkar glæsileg og deildinni til sóma.

 

Þau voru kát sigurliðið enda vel að sigrinum komin.

 

 

Þetta var samt klárlega uppáhalds liðið okkar.

 

 

Þau stóðu sig mjög vel þessir flottu krakkar í Eqeus.

 

 

Þessi komu galvösk úr Reykholtsdalnum, lið Leiknirs.

 

Mannlífið á þessum mótum var einkar gott, það er alltaf gaman þegar hestamenn hittast.

 

 

Þessi koma frá Söðulsholti hress og kát.

 

Beðið eftir úrslitunum.

 

Þessar eru alltaf í stuði, Harpan okkar og Karen sveitungi.

 

 

Keppnis.

 

Þessar skvísur voru kátar.

 

Þessi voru mætt á bekkina til að hvetja sitt lið.

Mig grunar að þau hafi átt sama uppáhalds lið eins og við. Enda voru sonurinn og tengdadóttirin að standa sig vel.

 

 

Þétt setið á bekkjunum.

 

 

Þessi voru kát og ánægð með sinn mann.

 

 

Maron kominn í góðan félagsskap með hressum dömum.

 

 

Oddsstaðhjónin skemmtu sér vel.

 

 

Brosmildar frá Danmörku.

 

 

Hress og kát að vestan............

 

 

Fulltrúar Lunda voru að sjálfsögðu mættir til að fylgjast með sinni dömu.

 

 

Þessar vor klæddar m.v aðstæður allavega þegar búið var að opna höllina í gegn.

Uppáhalds sparisjóðskellurnar mínar.

 

 

Fulltrúar úr Eyja og Miklaholtshreppi voru mættir.

 

 

Beðið eftir skeiðinu.

 

 

Það er gott að rétta úr sér í hléinu..........

 

Það er alveg ljóst að Vesturlandsdeildin í hestaíþróttum er komin til að vera. Þeir sem eiga heiðurinn af því að koma þessari mótaröð á koppinn hafa staðið sig vel. Auðvita er það svo að eitthvað þarf að fínpússa en það er bara spennandi verkefni fyrir næsta ár.

Þegar mótaröðin fór af stað heyrðust þær raddir að þetta mundi skaða KB mótaröðina sem keppt hefur verið í undanfarin ár.

Ég er þeirrar skoðunar að báðar þessar deildir njóti góðs hver af annari og ekki í boði annað en að þær haldi báðar áfram.

Eitt er þó mikilvægt að muna á bak við svona skemmtun eru margir sem leggja ómælda sjálfboðavinnu á sig og þeim bera að þakka sérstaklega. Þeir fá sjaldnast þær þakkir sem þeim ber. Fallegt orðfæri um þeirra störf eru fjaðrir í hatt okkar hestamanna.

 

Mig er strax farið að hlakka til næstu mótaraðar hér hjá okkur á vesturlandi.

 

Takk fyrir allir þeir sem að þessum viðburðum komu.

Þetta var gaman.

 

 

 

 

 

 

21.03.2016 22:37

Skeiðsigrar og afmælistamningar

 

Fannar og Mummi gerðu góða ferð í Borgarnes þegar þeir tóku þátt í KBmótaröðinni fyrir stuttu.

Þ.e.a.s þegar keppt var í flugskeiði í gegnum höllina.

Þeir félagarnir sigruðu þá keppni og á meðfylgjandi mynd eru þeir að vega og meta verðlaunagripinn. Mummi fór einnig með Gangskör sem endaði í 5 sæti í tölt.

Það er líflegt hér í Hlíðinni eins og svo sem alltaf. Góða vinnufólkið okkar stendur sig með mikilli prýði og um þessar mundir erum við svo heppin að vera með verknema frá Danmörku. Og svo er hún Beký okkar í heimsókn líka en hún var einu sinni að vinna hjá okkur í Hlíðinni.

Já mikið fjör og mikið hlegið hér á bæ.

Góða veðrið er alltaf skemmtilegt og sennilega fær maður aldrei nóg af því. Það er verst hvað maður ætlar alltaf að gera mikið þegar það stendur. En með aldri og þroska venst maður því að ekki er endilega víst að alltaf hafist af.

Við Mara sparitík ætlum að gefa í og vera sérlega duglegar að læra til smala-ofurhunds í apríl.

Mara er frá Marinó og Freyju bændum á Eysteinseyri við Tálknafjörð.

Sennilega er best að námið hjá okkur hér heima hefjist 1 apríl.

Þetta verður eins og þegar snillingar hefjast handa við að læra til prests. Við munum leggja hart að okkur við námið en svo kemur í ljós hvort við fáum ,,brauð,, eða förum bara að harka í einhverri annari atvinnugrein. Ferðaþjónustan kemur sterk inn ef ekkert gengur í bransanum.

Við gætu kannski passað uppá að norðuljósafarar færu sér ekki að voða.

Ferðamannaforráðar væri kannski eitthvað fyrir okkur Möru ?

En ég átti alltaf eftir að segja ykkur frá því að þegar húsfreyjan varð 50 ára (sem hefur bara gerst einu sinni) fékk hún margar skemmtilegar gjafir. Þar á meðal var gjöf frá Svani og Höllu í Dalsmynni sem sagt tamningatímar á Möru.

Mér þótti afar vænt um þessa gjöf þar sem ég ákvað að túlka hana þannig að Svanur hefði allavega trú á annari hvorri okkar.

Það var svo einn fagran dag sem ég mætti með Möru mína til Svans. Þar sem húsfreyjan var ný orðin fimmtug og reynslunni ríkar fór hún betur með spenninginn en Mara. Hún hafði frekar litla reynslu af bílferðum og nýjum bæjum. Kom reyndar í pappakassa frá Eysteinseyri en það var sennilega grafið og gleymt.

Þegar Mara kom útúr bílnum á hlaðinu í Dalsmynni réði hún sér vart fyrir fögnuði og forvitni. Hún sem er róleg, ljúf og meðfærileg heima fyrir breyttist skyndilega í ofvirkan krakka sem aldrei hefur heyrt um Rídalín.

Það var eins gott að bleika hálsólin sem keypt var í KS fyrir margt löngu var sterk. Ekki var síður heppilegt að pundið í húsfreyjunni vegur svolítið og því varð skoðunarferðin um Dalsmynnisland heldur styttri en Mara hefði kosið.

Eftir örskoðun á smalahólfi og sauðfé var Möru boðin gisting á fína hundaóðalinu hans Svans. Húsfreyjan drakk kaffi og brunaði síðan heim með krosslagða fingur og von í brjósti um þokkalega hegðun Möru.

Þegar liðið var vel á aðra viku var tímabært að sækja gripinn. Við útskrif var auðvitað farið með Möru í kindur til að sýna hvernig staðan væri á henni. Ekki var annað að sjá en þeim Svani og Möru hefði samið þokkalega enda var það fyrir mestu.

Eins og á alvöru tamningastöðum er mikið um að vera og þegar Svanur og Mara höfðu sýnt hvað í þeim bjó var næsti hundur kominn á hliðarlínuna. Var því ekkert að vandbúnaði að leggja af stað heim með gripinn.

Þá var bara að smella kossi á hundatemjarann og halda heim frekar hressar í bragði............. báðar tvær.

Nú er það bara okkar Möru að finna út á hvorri hann hafi trúnna...........

Verkefni fram undan er hinsvegar að venja saman tík og húsfreyju með það að markmiði að þær verði nothæfar til smalamennsku.

Geldu gemlingarnir eru vonandi til reiðu eins og til var ætlast.

Góðar stundir.

17.03.2016 20:47

Fósturtalning 2016

 

Fósturtalning fór fram í gær þegar Guðbrandur í Skörðum kom og kíkti í ,,jólapakkana,, hjá okkur.

Hér á bæ er alltaf svolítill kvíði fyrir þessum degi en líka spenningur.

Að þessu sinni getum við bara vel við unað og erum mjög ánægð með útkomuna á eldra fénu.

Gemlingarnir sem komu afar vel út í fyrra hafa ekki lagt línurnar fyrir komandi kynslóð.

Eða með öðrum orðum gemlingar þessa árs eru ekki að standa sig jafn vel og gemlingarnir í fyrra.

Það er þó ljóst að við eigum von á fjölda lamba og alveg þess virði að láta sig hlakka til sauðburðarins í vor.

Þrí og fjórlembur hafa nú fengið sérstakan sess í fjárhúsunum og njóta dekurs, eins er gert sérlega vel við tvílemdu gemlingana.

Já það borgar sig að standa sig.

 

 

Það er góð samvinna á milli bæja hér í Hnappadalnum og bara þónokkuð fjör þegar eitthvað stendur til.

Þessir góðu grannar ræddu málin á jötubandinu, Sveinbjörn og Sigríður Jóna Hraunholta húsfreyja voru kát og hress.

 

 

Allir hjálpa til og gera daginn bara betri.